Home

Effen veurstellen

 

thea (Small) Zolange da-k laezen kanne, lig der wal een laesbook of gedichtenbundel in miene buurte.
Een fascinaerend verhaal met daorin prachtige zinnen of een gedicht waorin schienbaor
moeiteloos een geveul wordt verwoord, kan mien raken. 
Ik zol ’t neet können missen.

Schref ik as kind al graag verhaaltjes, in de jaoren negentig kwam daor meer regelmaot in,
toen ik elke maond een verhaal  veur een huusblad ging schrieven.
Zomaor wat verhalen, bedacht of juust de werkelijkheid.
Weer later kwammen daor de korte gedachtes bi’j,
dee ik schrieve onder miene name doroTheja.
In zo weinig meugelijk weurde opschrieven wat een gebeuren of een geveul met mien dut.
Daor ovver naodenken, daor met bezig waen, göf mien rost en dan vergaet ik de tied.

 Fotografaeren is ne andere hobby van mi’j en op den duur bun ik foto’s
gaon combineren met teksten. Natuurlijk alles in de taal waorin in denke en praote:
miene moderstaal, ’t dialect van de Achterhook!
Zo probaer ik mien steentje bi’j te dragen um onze streektaal te beholden.

Umdat dee taal mot blieven, umdat e bi’j ons heurt , ons ne eigen identiteit göf,
met al zien mooie weurde en gezegdes!
Dat mag neet verlaoren gaon!

 De doroTheja wenskaarte in de streektaal

Met die combinatie van foto en tekst is de wenskaarte in de streektaal ontstaon.
Op dizze site staot alle wenskaarten dee-k tut no to emaakt hebbe.

I’j könt ze bekieken en i’j könt ze bestellen.
Der bunt wenskaarten veur allerlei gelaegenheden, van een verjeurdag tut ne karstkaarte.

 Verhaal en een gedachte.
Elke maond zet ik een ander verhaal en gedachte op dizze site.

Ik hoppe da-j ze regelmaotig zölt laezen, dat ze ow möcht raken
en heel graag heur ik ow commentaar!

 Gedachtes op dook.
Sinds kort bunt miene gedachtes, eventueel met achtergrondfoto,

te bestellen op dook. ’t Formaat kö-j meestal zelf bepalen.
Laes i’j een gedachte van mi’j en dèn sprök ow an, nem dan contact met mi’j op
en wi’j bespraekt samen ho ’t deruut mot kommen te zeen.
Mooi an de wand in de won- of warkkamer, gang of wachtkamer.

 Landgood Kotmans in buurtschap Miste, Wenterswiek
Gao-j wal ’s fietsen of wandelen, dan raod ik ow an um ’s richting

Landgood Kotmans te gaon. Hier is een mooi schrieverspad erealisaerd
en ondertussen hef al mennigen dichter of schriever, wee ne link met
onzen Achterhook en zienen taal hef, an dat pad ziene of eure favoriete boom
möggen planten met ne tekst van eurzelf op een bord der naost.
Ik heb ekozzen veur de gaele acacia,
umdat de kleur van zien blad ow de hele zommer ’t geveul  göf van lente! Van hoppe!

schrieversboom (Small) (2)

Ne combinatie van stilte in de natuur en mooie dichttaal, daor kö-j van genieten!

 Völle plezaer en ne hartelijke groet van    Thea